Það var einstaklega notalegt að heyra ekki í rigningunni þegar ævintýrastelpur vöknuðu á 4. degi. Eftir morgunstund skelltu þær sér út í leiki með foringjum áður en þær komu inn í ilmandi kornfleggskjúkling.
Dagskráin var þétt eftir hádegið en þar bar hæst hinn margrómaða ævintýraleik um svæðið. Í ár var leikurinn með Wicked þema og þurftu stelpurnar að flýja undan brjáluðum fljúgandi öpum sem reyndu eftir fremsta megni að koma þeim í fangelsi! Það voru þó góðar verur á sveimi sem gátu aðstoðað þær s.s. Fíeró, Glinda og Elfaba. Vonda nornin, Madame Morrible, reyndist einnig skænuhætt svo spennan var óbærileg.
Í kaffinu var boðið uppá pizzasnúða og súkkulaðiköku með lituðu kremi. Eftir kaffi var rigningin mætt á ný svo steinamálunin var færð inn í matsal. Einnig var boðið uppá heita pottinn auk þess sem foringjar voru með vinabandakennslu og undirrituð fléttaði hár. Í kvöldmatinn voru pítur sem stelpurnar voru sammála um að væru þær bestu sem þær hefðu smakkað.
Kvöldvökuskemmtunin var í höndum Hlíðavers og Hamravers og hlutu þær lof í lófa fyrir. Þegar farið var að styttast í kvöldbænina komu blaðskellandi foringjar inn í salinn og héldu „mini“-náttfatapartý. Lilja ráðskona truflaði reyndar partýið enda hafði þetta allt verið hinn mesti misskilningur og hún búin að baka vöfflur ofan í liðið! Það var því lítið annað í stöðunni en að skottast niður í matsalinn sem hafði verið dekkaður upp sem kaffihús og fá sér volgar vöfflur og kakó.
Bænakonur enduðu svo daginn með sínum herbergjum í sögustund fyrir svefninn.
Takk fyrir enn annan yndislegan Ölversdag!
Stella Rún, forstöðukona
KFUM og KFUK er kristileg æskulýðshreyfing sem hefur það að markmiði að stuðla að heilbrigði einstaklingsins til líkama sálar og anda.
Holtavegi 28
104 Reykjavík
Ísland
Kt: 690169-0889
