Dagurinn í dag var síðasti heili dagurinn okkar í þessum skemmtilega ævintýraflokki. Leikið var til úrslita í brennó, Amazing Race var í gangi eftir hádegi og svo hinn sívinsæli vinagangur seinnipartinn. Þá undirbúa stelpurnar eitthvað sem þær bjóða hinum stelpunum upp á og er því eitthvað skemmtilegt í boði í hverju herbergi. Hárgreiðsla, förðun og spákona var meðal þess sem var í boði í dag. Við héldum svo í messu í fallegu kirkjunni okkar áður en boðið var til pizzaveislu í matsalnum. Foringjarnir skemmtu stelpunum á kvöldvöku með alls kyns misgáfulegum leikritum en allt fannst stelpunum þetta voða skemmtilegt enda gaman að sjá foringjana bregða sér í margs konar hlutverk og fara á kostum á sviðinu.
Að kvöldvöku lokinni fórum við aftur upp í kirkju þar sem við sungum saman, hlustuðum á hugleiðingu og báðum bæn.
Á morgun mun sigurliðið í brennó keppa við foringjana en það er alltaf æsispennandi keppni.
Við leggjum af stað héðan um kl. 14 á morgun og því ágætt fyrir ykkur forráðamenn að vera komin á Holtaveginn upp úr kl. 14:30.
Hlökkum til að sjá ykkur,
kær kveðja úr Vindáshlíð
Álfheiður forstöðukona
KFUM og KFUK er kristileg æskulýðshreyfing sem hefur það að markmiði að stuðla að heilbrigði einstaklingsins til líkama sálar og anda.
Holtavegi 28
104 Reykjavík
Ísland
Kt: 690169-0889
