Í morgun voru stelpurnar formlega orðnar Hlíðameyjar, eftir að hafa gist samfellt í 3 nætur og því var fagnað með Cocopufs í morgunmat.
Þar sem var rigning þá héldum við fánahyllingu innanhúss og fórum svo á Biblíulestur að heyra um blindu mennina og fílinn (góð saga – endilega spyrjið þær um hana).
Eftir það var haldið niður í íþróttahús þar sem keppt var um 1-2 sæti í brennó og svo 3-4 sætið, til mikils er að vinna því það herbergi sem verður í 1.sæti fær að keppa við foringjana á morgun.
Í hádegismat var svo mexikósúpa með osti og snakki, heldur betur gott að fá heita súpu þar sem enn var rigning og hálf kalt. Eftir það var farið aftur í íþróttahús í TOPMODEL hönnunarkeppni og sýningu úr plastpokum og einhverju tilfallandi.
Í kaffinu fengu þær súkkulaðiköku og kryddbrauð og svo hófst hárgreiðslukeppni, vinagangur og allar að gera sig klárar í veislukvöld.
Pizza í kvöldmat, verðlaun veitt fyrir íþróttakeppnir vikunnar, ratleik, brennó og fleira og svoooo veislukvöldvaka í boði foringja sem voru hver öðrum fyndnari í hinum ýmsu leikritum.
Ís og saga í kvöldkaffi – bænó og miserfitt að fara að sofa, þar sem margar eru komnar alveg á yfirsnúning af þreytu þá var stutt í smá tár. En foringjarnir okkar eru meistara knúsarar og á endanum sofna alltaf allar.
Sjáumst á morgun á Holtavegi sirka um 14.30
Bestu kveðjur, Hanna Lára forstöðukona
KFUM og KFUK er kristileg æskulýðshreyfing sem hefur það að markmiði að stuðla að heilbrigði einstaklingsins til líkama sálar og anda.
Holtavegi 28
104 Reykjavík
Ísland
Kt: 690169-0889
