Vindáshlíð 3.fl. dagur 2

Heil og sæl kæru foreldrar/forráðamenn

Hér voru flestar vaknaðar fyrir 9 í morgun þegar átti að vekja þær og allar í flottu stuði, sváfu vel og voru glaðar. 

Þar sem við báðum um gott veður í gær þá fengum við það aðeins í bakið í nótt – þar sem var alveg logn og átti því lúsmýið greiða leið að okkur og smökkuðust sumar mun betur en aðrar. Því erum við búnar að gefa ofnæmistöflur, mildison og afterbite – en enginn hefur þó tapað gleðinni – vonum að það haldist bara svoleiðis. 

Í hádegismat var steiktur fiskur, kartöflubátar, grænmeti og ískalt vatn. Stelpurnar borðuðu vel – enda þarf maður mikla orku fyrir allt þetta fjör. 

Farið var í ratleik í útiveru þar sem herbergin fóru saman á milli stöðva að leysa hinar ýmsu þrautir. Veðrið var skýjað og pínu kalt en þær létu það nú ekki stoppa sig. Svo var komið inn í dásemdarkaffitíma þar sem voru snúðar með glassúr og bananabrauð í boði með djús að drekka. 

Eftir kaffi voru áfram íþróttir, brennó, föndur, vinabönd og voru næstu herbergi að undirbúa atriði fyrir kvöldvöku. 

Stelpurnar fengu sér síðan lasagna og hvítlauksbrauð í kvöldmat – eftir matinn fóru þær á stjá að spreyja flugnaspreyi í herbergin og gangana til að vera viðbúnar að mæta flugum næstu nætur við mismikinn fögnuð stelpnanna (þar sem lyktin var mjöööög sterk).

Kvöldvakan gekk vel – dansað, sungið – horft á leikrit og hlegið og klappað. 

Eftir dásamlegan dag var þreyta farin að síga á marga þegar var farið að hátta, pissa og bursta – en þá skall á þrusupartý þar sem dansað var uppi á borðum og mikið fjör. 

Nú eru langflestar sofnaðar og sofa vonandi vel og lengi (eða allavega til 9).

Munið að skoða reglulega myndasíðuna – því það bætist reglulega í albúmið okkar.

Kærleikskveðjur, Hanna Lára forstöðukona