Sumarbúðir

Hefðbundnum flokkum er skipt á eftirfarandi aldursbil:
9-11 ára
10-12 ára
11- 13 ára

Þátttakendur koma sér fyrir á númeruðu borði í Matskálanum við komuna í Vatnaskóg, sem verður eiginleg bækistöð þeirra yfir flokkinn. Gætt er þess að vinir sitji saman. Við hvert borð er borðforingi sem annast þátttakendur og hefur gott eftirlit með þeim. Auk borðforingja eru aðrir foringjar og svo forstöðumaður sem leiðir flokkinn og heldur utan um samskipti við forsjáraðila ef þess þarf.

Dagskrá í flokkum í Vatnaskógi inniheldur m.a. knattspyrnumót, frjálsar íþróttir, báta og smíðar, gönguferðir, leiktæki líkt og hjólabíla, stangartennis, borðtennis og þythokkí. Kvöldvökur og morgunstundir, með leikritum, söng, hugleiðingu og fleira. Endalaus skemmtun í fallegri náttúru.

Vatnaskógur býður upp á þrjá ævintýraflokka yfir sumarið, fyrir 12-14 ára drengi.
Ef drengur hefur komið áður í dvalarflokk er tilvalið að skrá hann í ævintýraflokk þar sem dagskráin er bæði hefðbundin líkt og í öðrum flokkum, en með fleiri ævintýralegum uppákomum sem oft teygja sig lengra inn í kvöldið. Þó er alls ekki nauðsynlegt að hafa áður komið í Vatnaskóg til að skella sér í ævintýraflokk!

Í mörg ár hefur Vatnaskógur boðið upp á sérstakan flokk fyrir alla unglinga á aldrinum 14-17 ára. Ólíkt öðrum flokkum sitja unglingarnir þar sem þau vilja yfir vikuna og eru dugleg að flakka á milli og kynnast nýju fólki. Ef börnum í ævintýraflokkum finnst farið seint að sofa, bíðið bara, nóttin er ung í Unglingaflokk, en engar áhyggjur, starfsfólk okkar tryggir öllum góðan nætursvefn, enda þarf að hafa orku fyrir alla þá fjölbreyttu dagskrá sem boðið er upp á.