Í morgun var vaknað við fuglasöng og frábært veður – betri byrjun á síðasta heila deginum í Gauraflokknum er varla hægt að hugsa sér! Strákarnir voru fljótir fram úr og dagskráin hófst með mikilli eftirvæntingu.
Seinni partinn í gær var farið út í skóg þar sem við poppuðum yfir opnum eldi. Þetta var róleg og notaleg stund þar sem margir nutu sín vel í náttúrunni og hlógu saman yfir poppi og sögum. Um kvöldið var svo haldin glæsileg hæfileikasýning á kvöldvöku þar sem strákarnir stigu fram og sýndu hversu hugmyndaríkir og hugrakkir þeir eru – sungið, spilað, teiknað og jafnvel töfrað!
Í dag verður haldin hin margrómaða aflraunakeppni Vatnaskógarvíkingurinn, þar sem strákarnir fá að spreyta sig á styrk, útsjónarsemi og þrautseigju. Sigurvegarinn hlýtur nafnbótina Vatnaskógarvíkingur Gauraflokks 2025!
Að kvöldi dags höldum við veislukvöld, með glæsilegum mat, eftirréttum og síðustu kvöldvöku sumarbúðanna – sem verður eflaust stórbrotin og skemmtileg.
KFUM og KFUK er kristileg æskulýðshreyfing sem hefur það að markmiði að stuðla að heilbrigði einstaklingsins til líkama sálar og anda.
Holtavegi 28
104 Reykjavík
Ísland
Kt: 690169-0889
