Lúk 2.1-20

En það bar til um þessar mundir að boð kom frá Ágústusi keisara, að skrásetja skyldi alla heimsbyggðina. Þetta var fyrsta skrásetningin og var gerð þá er Kýreníus var landstjóri á Sýrlandi. Fóru þá allir til að láta skrásetja sig, hver til sinnar borgar.

Þá fór og Jósef úr Galíleu frá borginni Nasaret upp til Júdeu, til borgar Davíðs, sem heitir Betlehem, en hann var af ætt og kyni Davíðs, að láta skrásetja sig ásamt Maríu heitkonu sinni sem var þunguð. En meðan þau voru þar kom sá tími er hún skyldi verða léttari. Fæddi hún þá son sinn frumgetinn, vafði hann reifum og lagði hann í jötu af því að eigi var rúm fyrir þau í gistihúsi.

En í sömu byggð voru hirðar úti í haga og gættu um nóttina hjarðar sinnar. Og engill Drottins stóð hjá þeim og dýrð Drottins ljómaði kringum þá. Þeir urðu mjög hræddir en engillinn sagði við þá:

Verið óhræddir, því, sjá, ég boða yður mikinn fögnuð sem veitast mun öllum lýðnum: Yður er í dag frelsari fæddur, sem er Kristur Drottinn, í borg Davíðs. Og hafið þetta til marks: Þér munuð finna ungbarn reifað og liggjandi í jötu.

Og í sömu svipan var með englinum fjöldi himneskra hersveita sem lofuðu Guð og sögðu:

Dýrð sé Guði í upphæðum og friður á jörðu og velþóknun Guðs yfir mönnum.

Þegar englarnir voru farnir frá þeim til himins sögðu hirðarnir sín á milli:

Förum beint til Betlehem að sjá það sem gerst hefur og Drottinn hefur kunngjört okkur.

Og þeir fóru með skyndi og fundu Maríu og Jósef og ungbarnið sem lá í jötu. Þegar þeir sáu það skýrðu þeir frá því er þeim hafði verið sagt um barn þetta. Og allir sem heyrðu undruðust það er hirðarnir sögðu þeim. En María geymdi allt þetta í hjarta sér og hugleiddi það. Og hirðarnir sneru aftur og vegsömuðu Guð og lofuðu hann fyrir það sem þeir höfðu heyrt og séð en allt var það eins og þeim hafði verið sagt.

Hugleiðing

Þegar við heyrum jólaguðspjallið þá er gott að spyrja sig hvort við höfum pláss fyrir Jesúbarnið. Jólasagan hefur gleðitíðindi:

Yður er í dag frelsari fæddur.

Frelsarinn fæddist til að kenna okkur um Guð og sætta okkur við Guð. Jesús kom til að kenna okkur að það er alltaf til staðar von, kærleikur og nýtt upphaf.

Það er svolítið merkilegt að Jesús fæddist í fjárhúsi og þau sem fyrst fengu að heyra um fæðinguna voru fátækir fjárhirðar. Því að þau sem völdin og áhrifin höfðu ekki pláss fyrir litla fjölskyldu á ferð. Jólaguðspjallið, þessi gleðitíðindi, eru nefnilega líka áminning um að gefa Jesú pláss. Leyfa Jesú að dvelja í hjörtum okkar, að svara játandi þegar aðrir biðja um aðstoð og stuðning, en skella ekki hurðinni á þau.

Bæn

Guð, kenndu okkur að hleypa Jesú inn í líf okkar. AMEN.

Aukaefni